PROPOSTAS DE ENTROIDO. A NOSA VESTIMENTA

 O Entroido é unha das celebracións máis significativas da nosa cultura, e traballalo na aula permítenos conectar tradición, identidade e aprendizaxe de maneira vivencial. Partindo do noso proxecto anual CRArte: Das orixes á arte popular, decidimos converter en protagonista o Entroido de Cobres, afondando especialmente nas figuras das Madamas e Galáns, símbolo desta festa tan singular. Descubrimos as características dos seus traxes, cheos de cor, brillo e detalle: os sombreiros adornados con flores e espellos, as fitas, as chaquetas decoradas, as saias con lazos e os múltiples complementos que fan que cada indumentaria sexa única e espectacular.

Propostas na aula

A través de diferentes actividades adaptadas ás idades do alumnado, desenvolvemos múltiples competencias:

📖 Lectoescritura
Traballamos vocabulario específico relacionado co Entroido (madama, galán, sombreiro, fitas, flores…)

🎨 Creatividade
Deseñamos os nosos propios traxes de madamas e galáns empregando distintas técnicas plásticas: collage, recorte e pegado.

✂️ Motricidade fina
A través do recorte de siluetas, o pegado de pequenos adornos, a elaboración de detalles decorativos e dos collares, traballamos a precisión, a coordinación óculo-manual e o control dos movementos.

🧠 Atención e concentración
Realizamos actividades de observación para identificar diferenzas entre traxes, series e secuencias con elementos decorativos, así como xogos de memoria, Doodle e xogo do Lince, todos eles  relacionados cos compoñentes da vestimenta tradicional.

Este proxecto permitiunos non só traballar contidos curriculares de maneira globalizada e significativa, senón tamén poñer en valor o patrimonio cultural galego, fomentando no alumnado o respecto polas nosas tradicións.