ESCOLA DE BÉRTOLA - CRA de Vilaboa

 Hoxe visitamos a escola de canteiros de Poio, unha experiencia moi enriquecedora para coñecer de preto un oficio con séculos de tradición en Galicia. Durante a visita amosáronnos as aulas, onde o alumnado recibe formación teórica sobre debuxo, historia da arte e técnicas construtivas, fundamentais para comprender o traballo posterior no taller. No taller puidemos ver como realizan as súas pezas en pedra, empregando ferramentas tradicionais e modernas, pero tamén traballan con outros materiais como o xeso e o barro, que lles permiten practicar volumes, moldes e acabados antes de afrontar proxectos máis complexos. Grazas aos mestres por ensinarnos todas as instalacións con tanto cariño. Antes de realizar a visita ás instalacións, demos un paseo polos petroglifos da Caeira e merendamos xunto aos nosos compañeiros/as das escolas de Paredes e Figueirido. Foi un día moi especial.

 Despois da lectura do conto “O carnaval dos animais” , inspirámonos na maxia da música para realizar unha actividade creativa moi especial. Escoitamos un fragmento da obra do compositor francés Camille Saint-Saëns e deixámonos levar polas súas melodías cheas de ritmo e imaxinación. A través da pintura, cada nena e cada neno expresou as emocións, cores e movementos que a música lles transmitía. Así, os sons transformáronse en pinceladas, os animais en formas e as sensacións en auténticas creacións artísticas. Unha experiencia sensorial que uniu literatura, música e arte nun mesmo espazo creativo.