"A GRAN CUBRICIÓN"

 No marco do Día Mundial da Arte, no CRA levamos a cabo unha actividade colectiva titulada A gran cubrición. O alumnado participou nunha intervención artística cubrindo o camiño que une o Concello coa BiblioCRA, empregando as súas propias creacións realizadas durante o Proxecto Lapis: obxectos e cubricións, integrado na Rede Planea de Arte e Escola.

Esta acción converteu o espazo público nun lugar de expresión e encontro, poñendo en valor a creatividade, o traballo colaborativo e a presenza da arte na vida cotiá.

Previamente visitamos a exposición "Vilaboa unha contorna sorprendente" na entrada do Concello.

Ao chegar á escola reflectimos no papel a experiencia vivida.

HORTIÑA

Hoxe na nosa horta escolar levamos a cabo unha actividade moi enriquecedora na que os nenos e nenas participaron na plantación de distintos vexetais, como tomates, fresas, cabaciños e leitugas. A través desta experiencia, puideron coñecer de primeira man o proceso de cultivo, coidar das plantas e comprender a importancia do respecto polo medio natural.

Como parte final da actividade, o alumnado realizou un rexistro no que plasmaron o aprendido, debuxando e escribindo sobre o proceso seguido e as súas observacións. Deste xeito, fomentouse tanto o traballo práctico como a reflexión sobre a experiencia vivida.